Media Hüququ İnstitutu gənc bloqqerlər Emin Milli və Adnan Hacizadəni qurama xuliqanlıq ittihamı ilə uzun müddətə azadlıqdan məhrum edən məhkəmə hökmünü Azərbaycanda söz azadlığının boğulmasına yönəlmiş yanlış siyasi qərar hesab edir.

Emin Milli və Adnan Hacızadə toplumda, özəlliklə fəal gənclər arasında böyük nüfuza sahib olublar, ölkədəki problemlər barədə tənqidi düşüncələrini çəkinmədən cəmiyyətlə bölüşüblər. Ölkədə çoxlarına bəlli olan bir hadisə ətrafında satirik məzmunlu, ki¬nayəli videoklipin müəllifləri olan gənc bloggerlərə qarşı açıq-aşkar qurama xuliqanlıq ittihamı irəli sürülüb. Bu ittihamları nə onu incələyən istintaq orqanları, nə də bu gün ağır hökm verən Səbayıl rayon Məhkəməsi ədalətlə araşdırıb, onlar açıq-aşkar kənar tapşırıqları icra etdiklərini göstəriblər. İstintaq və məhkəmə prosesi gənclərin azadlıq və ədalətli mühakimə hüquqlarının kobud pozuntuları ilə müşayət olunub.

Media Hüququ İnstitutu hesab edir ki, Səbail Məhkəməsinin Emin Millini 30 ay, Adnan Hacızadəni 24 ay həbs cəzasına məhkum etməsi hətta uydurulmuş ittihamlara nisbətdə belə adekvat sayıla bilməz. Hökumət bu zərərli və qorxunc qərarı ilə onu tənqid etdiyinə görə həbsxanada saxladığı şəxslərin sayı ilə bağlı bədnam statistikanı daha da pisləşdirib.

Media Hüququ İnstitutu həm bu qərarın, həm də söz azadlığının böğulmasına yönəlmiş əvvəlki bədnam qərarların acı nəticələrinin tez bir zamanda aradan qaldırılmasının təxirəsalınmaz zərurət olduğunu vurğulayır. MHİ Azərbaycan hökumətini “tənqidçi söz deyənlərin qənimi” ob¬ra¬zı¬nı aradan qaldırmaq naminə ilkin addım olaraq Emin Milli və Adnan Ha¬cı¬¬zadəni azad etməyə çağırır.